Основните и средните училишта во општина Струмица се комплетно подготвени за почетокот на новата 2014/2015 година, ова денеска го потврди претседателот на Советот на општина Струмица, Јосиф Христов, на прес конференцијата што се одржа во општинското основно училиште „Св. Кирил и Методиј“ во населеното место Дабиле.
– За два дена почнува новата учебна година. Сакаме да ја информираме јавноста, посебно родителите, иако тоа и досега континуирано го правевме за време на летниот распуст, дека сите основни и средни училишта во општина Струмица се комплетно подготвени за изведување на воспитно – образовниот процес.
– Сите 13 основни и 3 средни училишта, летниот распуст го искористија за материјално – техничко и организациско подготвување, согласно сопствените планови, но и реализирајќи ги препораките од надлежните институции.
– Покрај вообичаените редовни активности, како што се, варосување, бојадисување и обновување на инвентарот, во одредени училишта се изведени и покрупни зафати кои ќе обезбедат подобри услови за изведување на наставниот процес. Сакам да нагласам дека во сите училишните објекти се извршени дезинфекција, дезинсекција и дератизација, според препораките на државните стручни служби.
Новата учебна 2014/2015 година во општина Струмица ќе ја почнат вкупно 8.109 ученици, од кои 4.479 во основното и 3.630 во средното образование.
