Спортисти, велосипедисти, рибари, семејства со деца се само дел од оние кои првиот делумно слободен викенд по две недели полициски час за време на целиот викенд го искористија за шетање по кејот на Вардар. Голем дел од нив со заштитни маски, но ја почитуваа и уредбата на Владата за држење дистанца од два метри.
Иако на кејот беше полно, присутните избегнуваа контакт едни со други. Повозрасните лица кои го користеа сончевото време и се шетаа, носеа заштита на своите лица. Младите пак, се тргаа настрана од останатите, а истото беше и со родителите кои ги шетаа своите деца.
Со исклучоци, можеше да се забележи и групирање на повеќе од пет лица што е спротивно на уредбата на Владата, но, на кејот немаше полиција која би можела тоа да го санкционира или да предупреди за прекршувањето на оваа мерка. Претежно, стануваше збор за луѓе кои сончевото време го користеа за трчање, но и велосипедисти.
Инаку, по двенеделната целосна забрана за движење за време на викенд, Владата донесе уредба со која го олабави полицискиот час, кој сега почнува во саботите во 15 часот и трае до понеделник до 5 часот. Со цел превенција од коронавирусот, Владата воведе три мерки, односно задолжително носење на заштитни маски во затворен простор и во случај да не може да се одржи препорачаната дистанца, држење дистанца најмалку два метри и забрането групирање.