Генералниот секретар на СДСМ, Оливер Спасовски, потпретседателот Александар Кирацовски и пратеникот Васко Ковачевски денес се во посета на Ресен и преспанскиот регион.
Претставниците на СДСМ остварија повеќе средби, слушајќи ги проблемите на жителите од овој крај.
Граѓаните ја потенцираа негрижата на Владата и нефункционирањето на Кризниот штаб во Ресен по невремето кое го зафати целиот овој регион.
Уништени се голем број земјоделски посеви а никој не ни помога, се пожалија ресенчани.
Генералниот секретар на СДСМ, Спасовски посочи дека во Буџетот на РМ предвидена е ставка за елементарни непогоди, но тие средства власта ги користи единствено пред избори, кога им се потребни гласови.
„Едноставно е. Општината треба да достави колку средства треба да бидат префлени од Буџетот и на седница на Влада, со една одлука, може да се реши овој проблем. Механизми за решавање на проблемите постојат, но не и расположение кај надлежните“, посочи Спасовски.
Посетата на делегацијата на СДСМ предводена од генералниот секретар продолжи на традиционалниот Јаболкобер.
Воедно, на сите ресенчани, им го честитаа големиот христијански празник Крстовден, посакувајќи им добро здравје и благосостојба.
