„Би сакал да ја известам прилепската и македонската јавност дека од денес повеќе нема да настапувам како дел од СДСМ и коалицијата и преминувам и ќе настапувам поддржувајќи го ВМРО-ДПМНЕ и Коалицијата за подобра Македонија.
Имено, јас како личност, а и во разговор со голем дел од граѓаните на Општина Прилеп кои гласаа за мене, не можам повеќе да се согласам со политиките кои ги води СДСМ. Политиките на отпор, бојкот и постојано нанесување на штета на градот и државата не се ниту моја желба, ниту желба на граѓаните кои ги застапувам. Во услови кога Прилеп постојано се развива, кога Република Македонија чекори кон економски напредок, кога постојано се реализираат проекти за доброто на граѓаните, кога постојно се исполнуваат условите потребни за влез во ЕУ и НАТО јас не би можел повеќе да бидам дел од политиките кои свесно го уриваат напредокот на нашата држава, политики кои свесно ја кочат нашата држава и Општина Прилеп, политики на СДСМ кои сакаат црни сценарија, а не напредок на нашиот град и нашата држава“, изјави Ерџан Еминоски.