Земјотрес со јачина од 4,8 степени според Рихтеровата скала синоќа предизвика вознемиреност кај жителите на Тетово и околината, а потресот беше почувствуван и во повеќе градови во земјава и регионот.
На социјалните мрежи се појавија снимки на кои е забележан моментот на земјотресот, кој во тетовскиот регион бил почувствуван со посилен интензитет.
Според Телеметриската сеизмолошка мрежа на Република Македонија, која ја одржува Сеизмолошката опсерваторија при Природно-математичкиот факултет во Скопје, земјотресот е регистриран во 22:05 часот. Епицентарот се наоѓа на територијата на Косово, на околу 45 километри северозападно од Скопје, со локална магнитуда од ML 4,6.
Потресот бил почувствуван во Тетово, Гостивар и околината со интензитет од V степени според Европската макросеизмичка скала. Во Скопје и околината интензитетот бил IV-V степени, додека во останатите делови од земјата изнесувал III-IV степени.
Земјотресот бил почувствуван и во Косово, Албанија и Србија.