Актерката, Синоличка Трпкова, во говорот пред МРТ кон граѓаните, Македонија ја спореди со циркусот Медрано каде што, како што рече, тренери удираат со камшици мали човечиња.
– Во цуркус животните се повеќе почитувани отколку луѓето во Македонија. Се случуваа протести, се случи Студентски пленум, Професорски, Средношколски и Наставнички пленум, а МРТ беше мртва. Студентите го окупираа Универзитетот и прв пат прогласија автономија, а МРТ беше мртва. Слушаме криминал на разговорите, како министри ја кројат судбината на луѓето, МРТ остана мртва – порача актерката.
На тврдењата дека собирот пред МРТ е партиски, таа ги праша насобраните граѓани дали е така и доби силни негодувања и извици дека не е.
– Ова е граѓански собир, тука сме дојдени затоа што ни е преку глава. Овој пат ќе ја извојуваме нашата битка и ќе ја ослободиме МРТ. Верувам дека сите во срцата носиме по еден храбар генерал. Да го разбудиме – порача Трпкова.
На насобраните граѓани им се обрати и Верица Ситниковска од Студентски пленум, која рече дека граѓаните најмалку што заслужуваат е да ја чујат вистината од МРТ затоа што тие ја плаќаат.
Маја Васева