Граѓани се собраа денеска попладне пред полициската станица „Пролет“ за да изразат почит кон прерано загинатите припадници на специјалните едници кои го изгубија животот во престрелките во Куманово.
На собирот преовладуваа националистички симболи. Пред полициската станица се вееше државното знаме, се пееше националната химна, граѓаните аплаудираа и скандираа „Македонија! Македонија!“.
Неколку поединци се издвоија од толпата и на полицајците им го предадоа државното знаме. Тие се ракуваа со нив, ги гушнаа, а полициските службеници им салутираа.
Граѓаните тргнаа од неколку точки во Скопје, за да се соберат пред полициската станица.
Oбјектот не беше воопшто обезбедуван од полициски единици. Собирот беше најавен преку банери поставени на порталите што важат за блиски до владејачката партија.
На самиот собир можеа да се забележат лица кои се членови на партијата, нејзини општински советници или поранешни директори. Во информациите за протестот стоеше дека го организира Граѓанското движење за одбрана на Македонија (ГДОМ), но не можеше да се види ниту еден од членовите на ова движење.
Паралелно додека траеше овој собир, пред Владата повторно се одржа протест против полициската бруталност од граѓани кои бараат оставка од Владата. Кога протестот пред „Пролет“ заврши, граѓаните кои маршираа за оставки пристигнаа пред Собранието.