Градоначалникот на Општина Карпош, Стевчо Јакимовски на денешната седница на Советот предлага да се донесе Одлука за долгорочно задолжување на општината за нови 2.5 милиони евра, вели Магдалена Несторовска, советничка во Советот на општина Карпош.
Ова ново задолжување со кредит од 2.5 милиони евра ке треба да го враќаме ние, граѓаните на Карпош.
За советниците на СДСМ и опозицијата ова е неприфатливо. СДСМ остро се спротивставува на вакви неразумни постапки на градоначалникот Јакимовски, по стапките на неговиот коалициски партнер Никола Груевски.
Општинската каса е празна, училиштата немаат доволно средства за греење, децата мрзнат. Според завршната сметка од 2013 година долгот на општината е околу 9 милиони евра а денес има намера дополнително да се задолжи, без да ги праша граѓаните.
Општина Карпош е пред финансиски колапс и парите на граѓаните треба да се трошат домаќински а не постојано да се задолжува. Наместо за мегаломански прослави и пеачи, наместо за прекубројни вработувања на сметка на општинската каса, наместо за репрезентација, парите треба да се наменат за решавање на проблемите на граѓаните на Карпош.
Целата процедура за ова ново задолжување е избрзана, несериозна, неподготвена и без консултација со граѓаните.
Зошто ако се задолжува општината не се почитува законот и не спроведе јавна расправа? Да ги прашаме граѓаните, дали се согласуваат дополнително да се дозадолжи општината со нови и нови долгови.
Граѓаните треба да донесат одлука за ова, затоа што утре Стевчо Јакимовски нема да биде градоначалник, ама кредитот останува да го враќаат граѓаните.