Миле Талевски, член на Советот на Општина Прилеп од СДСМ денеска во изјава за медиумите рече дека 12-годишното владеење на ВМРО-ДПМНЕ, оставило пустош во Општина Прилеп и во Република Македонија.
– Судските пресуди против градоначалниците од ВМРО-ДПМНЕ, меѓу кои и градоначалникот на Прилеп Марјан Ристески, се потврда за децениското несовесно и расипничко владеење на ВМРО-ДПМНЕ. Марјан Ристески, буквално го преспа третиот и дефинитивно последен градоначалнички мандат и не работеше за интересите на граѓаните!Ристески и ВМРО-ДПМНЕ зад себе оставаат огромна невработеност, задолжена општина, партизирани институции, уништено здравство и ниту еден реализиран капитален проект за граѓаните на општина Прилеп, рече Талевски.
Според него, залудни биле сите обиди на ВМРО-ДПМНЕ преку празни отчети и лаги за бегалски кампови да се обиде да ги затскрие неспособноста, криминалот и корупцијата во своите редови.
– После 15 октомври следува детална ревизија на работата на општинската власт и преиспитување на сите сомнителни тендери и договори. Секој што работел незаконски, ќе сноси одговорност. Граѓаните ја препознаа разликата помеѓу нечесното, деструктивно и коруптивно владеење на ВМРО-ДПМНЕ и одговорното работење на новата Влада предводена од СДСМ. Затоа, на локалните избори граѓаните ќе изберат нова одговорна локална власт за подобар живот на сите во општина Прилеп, рече Талевски.