„Во изминатиов период општина Гази Баба ја тресе скандал поврзан со информации пласирани во електронските медиуми за фалсификување на дипломата на господинот Благој Кчев – (референт во одделение за комунални работи), кој замислете успеал за само една година најпрво да магистрира, а потоа да дипломира.
Периодов од кога се пласирани тие информации не постои никаков демант од страна на Градоначалникот за настанатата ситуација што ни дава за право да веруваме дека станува збор за целосна вистина“, рече на денешната прес конференција Дарио Николовски, советник и координатор на советничката група на СДСМ од Општина Гази Баба.
„Како Советничка група на СДСМ Гази Баба го прашуваме Градоначалникот Тони Трајковски дали се вистинити наодите изнесени во јавноста?
Дали како резултат на стекнатите образовни квалификации, господинот Кчев се стекнал со повисоки позиции во општинската хиерархија и противзаконски се стекнал со повисоки месечни примања врз грбот на граѓаните?
Дали доколку се докаже дека информациите се вистинити, градоначалникот Трајковски кој веќе 6 и пол години не презема ништо за подобрување на условите за живот на граѓаните, ќе понесе одговорност.
Граѓаните на Гази Баба имаат право да ја знаат вистината“, изјави Дарио Николовски.