Лично му ги предадов документите на поранешниот контраразузнавач Александар Диневски да ги објави во јавноста. Тие документи се мои и јас ја преземам одговорноста – изјави Иван Соколов, кој денеска се појави како сведок на рочиштето во случајот „Шпион“, на барање на обвинетиот Диневски.
Тој смета дека притворот на Александар Диневски претставува политички реваншизам и монтиран процес на матичната ВМРО – ДПМНЕ кон поранешниот контраразузнавач. Наместо признание за неговите заслуги со кои придонел за партијата, вели Соколов, Диневски е обвинет дека е шпион и работи против интересите на државата.
– Се работи за документи кои се од моето лично досие и му ги предадов на почетокот на 2001 година и го замолив јавно да ги публикува. Тоа го направив и со други новинари кои не покажаа храброст да пишуваат за ова досие или да извадат дел од него. Сега е јасно како ден зошто новинарите ништо не сакаа да објават, бидејќи ќе завршат токму како Александар Диневски, изјави тој за А1он.
На Соколов не му е јасно како токму Диневски во 90- тите години работејќи како аналитичар во Службата за државна безбедност и се вклучил во создавањето и градењето на ВМРО – ДПМНЕ, денес се соочува со монтиран случај од неговата партија.
Според него, токму Диневски бил заслужен за откривање на многу афери кои силно одекнале во јавноста, а ВМРО – ДПМНЕ ги користела умешно за да успее да ја зграби власта.
– Диневски со неговите активности успеа да ја закрепне ВМРО – ДПМНЕ и да ја дигне на нозе, без притоа да биде обвинет од службите и МВР дека е шпион, денеска во моментите кога матичната партија е на власт, таа го обвинува за шпионски активности. Обвинителството е во заложништво, судиите се срамат од тоа што го прават, им се гледа на лицата – рече Соколов.
Поранешниот контраразузнавач Александар Диневски беше притворен во аферата „Шпион“ за злосторничко здружување, оддавање државна тајна и шпионажа. Како што вели Соколов, не се знае точно и конкретно за кои дела е обвинет.
Петар Клинчарски