30 дена притвор за 14 уапсени, еден доби куќен притвор – ова е епилогот по големата акција на полицијата за разбивање на организирана група дилери на дрога во скопските населби Сингелиќ и Арачиново.
Групата подолго време препродавала дрога и оружје, а беа уапсени во вчерашната голема акција на специјалците кои извршија претреси на 27 локации, приведени беа 15 лица, сузбиени три организирани криминални групи инволвирани во недозволена трговија со дрога и оружје.
Како што информираше МВР под истрага за неовластена трговија со дрога и оружје се 18 лица.
Уапсените – 15 лица, се на возраст од 20 до 54 години, сите од Скопје, додека по тројца (З.Н., Е.Ш. и Ш.С.) полицијата се уште трага.
Според информациите на полицијата групата робата ја набавувале од Албанија и Косово, а ја криеле во Сингелиќ и Арачиново.
При извршените претреси, на повеќе локации се пронајдени и одземени кокаин и марихуана кои се предмет на вештачење, муниција, пиштол, патнички моторни возила, поголема сума на девизни и денарски парични средства, мобилни телефони.
Двајца од осомничените се сопственик и управител на стрелиште и нелегално продавале муниција набавена за потребите на стрелиштето.
Судот го прифати предлогот на Основното јавно обвинителство за гонење на организиран криминал и корупција за определување на мерка притвор за 14 лица, а на еден осомничен поради здравствена состојба му е определена мерка куќен притвор.
Мерка притвор во траење од 30 дена ја определи Кривичниот совет од Основниот кривичен суд Скопје. 12 лица се товарат за „неовластено производство и пуштање во промет на наркотични дроги, психотропни супстанции и прекурсори“, против М.Б.(32) за „неовластено производство и пуштање во промет на наркотични дроги, психотропни супстанции и прекурсори“ и „неовластено изработување, држење, посредување и тргување со оружје или распрскувачки материи”, како и против И.А.(38), Д.А.(54), А.С.(27), О.Н.(39) и М.Б.(42) за „неовластено изработување, држење, посредување и тргување со оружје или распрскувачки материи”.