Новинарите во Собранието денеска однесоа 123 маици за пратениците на кои пишува „Слобода за Кежо“. Тие беа предадени во архивата, и беше упатен повик до сите пратеници да земат по една и да ја облечат од понеделник, како поддршка за ослободување од притворот на новинарот Томислав Кежаровски.
– Јас би сакал само да апелирам до пратениците независно од која политичка партија, верувам дека сите ќе застанат во одбрана на демократијата и слободата на изразувањето и особено на легитимната цел, нашиот колега да се брани од слобода. Ние не ја прејудицираме неговата вина или невиност, но со оглед дека е јавен работник, новинар, да може да се брани од слобода.
– За нас вчера беше запрепастувачка веста дека експресно е закажано судење на 9 август, не знам дали досега во историјата на македонското судство се закажала експресно судење, но и изјавата на претседателот на судот дека јавниот притисок и целиот случај налага целиот процес да се процесуира се надевам дека тоа нема да е причина нашиот колега да продолжи да биде во притвор туку дека пред почетокот на судењето ќе биде ослободен, рече Зоран Димитровски, главен и одгворен уредник на Нова Македонија.
-Маиците точно 123, се предадени во архивата, пратениците во понеделник кој како чувствува, може да ги земе и да ги носи. Собранието е храм на демократијата и ова е адресата каде треаб да ја побараме поддршката за нашиот колега Томислав Кежаровски и општо за слободата на изразување, рече Сашка Цевтковска, новинар.
На Кежаровски притворот му беше продолжен по трет пат, а по острите реакции и обвинувања кои беа разменети помеѓу Кривичниот суд и новинарите, судот на сред одмори закажа експресно судење за случајот во кој е обвинет Кежаровски за откривање на идентитет на сведок, кој испадна дека е лажен.