Домашни но и странски туристи го наполнија Охрид за време на продолжениот викенд. Плажите „Градиште 1“, „Градиште 2“, „Градиште 3“ и „Оревче“, викендов ги дочекаа и првите туристи. Најчести гости беа младите, но и повозрасни туристи. За разлика од минатите години, кога во јуни се отвораа плажите, годинава, немаше гужви и турканици. Со почетокот на летната сезона, се полни и кампот Градиште. Овие плажи се едни од ретките кои не беа урнати во изминатиот период од Општина Охрид.
Најмногу има домашни туристи, а од автомобилите паркирани во близина на плажите, може да се забележи дека најчесто тоа се скопјани. Но, во Охрид, пристигнуваат и поголеми групи странци, кои доаѓаат преку тур-операторите.
Годинaва, на почетокот од сезоната речиси и да нема туристи на останатите плажи. Најпосетувани се комерцијалните плажи. Ако минатата година, потегот од Метропол до Пештани беше преполн со автомобили на улиците и туристи на плажите, таа слика оваа година изостанува. На некои од плажите и натаму работи градежната механизација на Општина Охрид која урива бесправно изградени објекти. По ова, ќе се започне и со уредување на просторот.
Минатата година, беа донесени и протоколи за работа на плажите. Тие налагаат задолжително растојание од 2 метри, редовно чистење и дезинфекција на околината на плажите, вработените да носат заштитни маски, како и ограничување на бројот на посетители на плажата согласно квадратурата, односно максимум 15 посетители на 100 м² нето површина. На плажите е задолжително меѓу индивидуалните чадори да се обезбеди минимално растојание од 4 метри, растојание од 1,5 – 2 метри помеѓу лежалките поставени под соседни чадори. Лежалките задолжително да се дезинфицираат пред и после користењето на секој посетител, а секое лице задолжително да постави пешкир на лежалката пред да ја употреби.