Плажите во Охрид втор ден по ред се исполнети до последно место. Со пешкири, подвижни фрижидери, куп јадење и пиење, маси и столици, домашните и странски туристи го поминуваат денот на крајбрежјето од Охридското Езеро. Нема место ниту на плажите на кои годинава и минатата се уриваа дивоизградените обејкти и шанкови, иако очекувањата беа дека тие ќе останат празни.
За да поминат што подолго време на плажа, има и посетители кои на плажа освен пијачки и грицки, носат патлиџани, пиперки, садови за салата. Имаше и такви кои понеле и печена кокошка.
Улиците на центарот на Охрид се испразнија, но затоа, гужва има од населбата свети Стефан па до Заливот на коските. Се вози бавно, а на моменти сообраќајот е и целосно блокиран поради метежот.
