„После подолг период Христијан Мицкоски кажа една голема вистина, а тоа е дека ова мнозинство во Собранието ќе расте“, изјави Јован Митрески, координатор на пратеничката група на СДСМ и коалицијата.
Тој вели дека Мицкоски ја излажал јавноста дека има 61 глас за ново мнозинство и за гласање недоверба на Владата.
„За овој негов неуспех Мицкоски нека не бара алиби, само на себе може да си се лути и да му се гади. Со денови еуфорично пумпаше невистини дека има 61 пратеници. Народот е излажан, нема ново мнозинство во Собранието и тој треба да ѝ се извини на јавноста и да понесе одговорност“, рече Митрески, додавајќи дека Мицкоски седнал со анти-НАТО и анти-ЕУ структури, како и партии кои се против концептот „Едно општество за сите“.
Митрески рече дека не знае каде се наоѓа пратеникот од БЕСА Кастриот Реџепи и дека очекува да излезе во јавноста наредниот период и да каже што му се случувало.
„Знам дека Реџепи како пратеник, како колега, е за европскиот и евроатлантската иднина на нашата држава“,изјави тој.