„Скопје 2014“ не заврши во 2014-та година. Бунарот без дно продолжува и во 2015-та година. Авторот на проектот е ист – Никола Груевски. Различен е само извршителот. Овој пат тоа е Коце Трајановски, рече на денешната прес-конференција Дамјан Манчевски, потпретседател на СДСМ.
„Оваа 2015 година, преку градот за проектот Скопје 2014 ќе се потрошат 46.175.000 ЕВРА и тоа на следните начини:
- 18 МИЛИОНИ ЕВРА за панорамско тркало
- 10 МИЛИОНИ ЕВРА за барокна административна зграда на ЈП Водовод и канализација.
- 6,8 МИЛИОНИ ЕВРА за нови барокни фасади на зградите во центарот на градот
- 5 МИЛИОНИ ЕВРА за нови фонтани и плоштади
- дополнителни 4,3 МИЛИОНИ ЕВРА за недоизградената катна гаража Даме Груев
- 1,3 МИЛИОНИ ЕВРА за довршување на новата градска куќа, односно за луксузни канцеларии за Коце Трајановски
- 325.000 ЕВРА за лифтови за катни гаражи
- 250.000 ЕВРА за илуминација на споменици и фонтани
- И внимавајте, 200.000 ЕВРА за уште еден карусел
Вкупно 46.175.000 евра за раскош и луксуз.
Граѓаните на Скопје имаат многу поголеми приоритети за коишто можат да се потрошат овие пари. СДСМ предлагаше и предлага овие пари да се пренасочат кон:
- финансирање вонредни мерки за намалување на загадувањето на воздухот
- ново средно училиште во Аеродром
- водовод за деловите од градот коишто сé уште не добиваат вода од централниот водовод
- субвенции за енергетска ефикасност
- бесплатен јавен превоз за студентите секој ден
- изградба на пречистителна станица
Или изградба на подземна сообраќајница во центарот на Скопје што чини 50 милиони евра, од којашто Коце Трајановски се откажа за сметка на раскошот и луксузот“, изјави Манчевски.