Нема да дозволиме брутален упад прифаќајќи го овој закон во правосудството, изјави пратеникот на СДСМ, Костадин Костадинов одговарајќи на новинарско прашање за ставот на СДСМ во врска со предлог-законот за амнестија што денеска го поднесе опозицијата во Собранието.
„Македонија е правна држава и тој принцип имаме обврска да го почитуваме. Точно знаеме што се крие зад предлог Законот за амнестија поднесен од антизападното раководство на ВМРО-ДПМНЕ, а тоа е амнестија на криминалите на режимот на Никола Груевски. Тоа не смееме и нема да го дозволиме“, гласеше коментарот на Костадинов.
Претходно пратеничката група на ВМРО-ДПМНЕ, поднесе предлог-закон за амнестија за настаните во Собранието на 27-ми април. ВМРО-ДПМНЕ бара лицата осомничени, обвинети или осудени за „крвавиот четврток“ да се ослободат од кривично гонење, да се запрат поведените постапки и целосно да се ослободат од издржување на казната затвор.