(ВИДЕО) Константин Димитров: Нè чека тешка зима, ако сме сега во кризна, тогаш ќе бидеме во воена состојба

Од:

Енергетската криза удри со сета сила врз Македонија, а се почувствува уште од минатата година, но ние како држава не презедовме мерки за да ги намалиме последиците од поскапувањето на основните енергенси за производство на електрична енергија, не обезбедивме услови за нормална работа на нашите постројки кои произведуваат електрична енергија, вели во интервју за „Макфакс“ универзитетскиот професор Константин Димитров од Центарот за енергетска ефикасност на Македонија.

Анализирајќи ја состојбата во државата во делот на енергетиката, Димитров оценува дека Владата дејствува со задоцнување од една година.

„Имавме изјава на Владата будно ја следиме состојбата. Ама не преземаме мерки… ама затоа ја следиме состојбата. И што сега? Преземаме мерки со година дена задоцнување и сега ќе трчаме и ќе коленичиме во Бугарија, да молиме да купиме електрична енергија. И нормално е дека нема милост. Каква братска состојба. Брат за брат, сирење за пари. Требаше да се растрчаме навреме, се знае со години дека Македонија увезува 30% електрична енергија“, истакнува Димитров.

„Чашка жолта и едно феферонче, ти жеже и не ти е потребно греење“, ова е препораката што универзитетскиот професор ја упатува со цел штедење и намалување на трошоците за претстојната зима.

Според него, најавите од власта за олеснување на административните пречки за поставување сончеви колектори за граѓаните и малите потрошувачи не се точни.

„Јавно кажувам, не е точно дека направија олеснување со законските измени. Со сончевите колектори многу се зборуваше, а малку се направи. Видете што прават во комшии, не мора да гледаме во Европа. Кај нас ништо не е олеснето за граѓаните да добијат дозвола за сончеви колектори. А со долгата бирократска процедура се отвораат многу можности за корупција“, оценува универзитетскиот професор.

Ги советува граѓаните да направат детална пресметка дали со веќе постоечките цени и со сите потребни давачки ќе им се исплати поставувањето сончеви колектори.

„Лага е ако некој вели дека за 4 години ќе се вратат парите од инсталација на сончеви колектори. Заштедата ќе зависи од тоа кога и колку едно домаќинство троши“, подвлекува Димитров.

Најавува тешка зима и додава дека е жално и срамно што државата не може да обезбеди електрична енергија за работа на училиштата во грејна сезона.

„Нè чека тешка зима, ако сега сме во кризна тогаш ќе бидеме во воена состојба“, потенцира во интервјуто за „Макфакс“, универзитетскиот професор Константин Димитров.

Би можело да ве интересира

(ВИДЕО) Новите сметки донесоа гнев – зошто повеќе пари за пренос отколку за потрошена струја?

Празничното украсување во Солун ќе се исклучува во 1 часот по полноќ за заштеда на енергија

А1он

Бугарската влада дава 200 евра помош за затоплување домови

А1он

ЕУ лидерите се договорија за рамка за справување со ценовниот шок од енергетската криза

Тарифите на електричната енергија во Италија покачени за 136 отсто

А1он

Митилинеос – Когенеративна постројка Скопје“ доби статус на стратешки инвестиционен проект