Денот на антифашистичкото востание 11 Октомври е еден од најзначајните денови во историјата на македонскиот народ и другите граѓани кои живеат во Република Македонија и затоа ја користам приликата да изразам благодарност за жртвите што ги дадоа околу дваесет и четири илјади припадници на вооружените сили за да ја ослободат Македонија, порача денеска кандидатот за градоначалник на Велес од СДСМ и Коалицијата Аце Коцевски.
Во наредниот период, додаде, се ќе направиме за да бидеме достојни продолжувачи на идеалите на паднатите жртви за слобода на Македонија.
Да не беше 11 Октомври 1941 година, рече, немаше да го има ниту 2 август 1944 година, ниту пак Денот на независноста 8 Септември.
– Периодот на Народно-ослободителната и антифашистичка војна е единствен период во нашата историја кој конечно после Кресненското, Илинденското и другите буни и востанија завршува со позитивен исход и како резултат на тоа е формирана современата македонска држава, рече Коцевски.
Една од првите работи што ќе ја направиме по освојувањето на локалната власт, истакна тој, ќе биде на паднатите борци од Народно-ослободителната војна, на народните херои да им се врати значењето како и дека нивните бисти ќе бидат вратени во паркот на хероите. Исто така, ќе се потруди и посмртни останки на Панко Брашнар во соработка со хрватските власти од Голи Оток да бидат донесени во неговиот роден Велес.