„Македонското здравство има капацитет и успешно се справува со вирусот Ковид-19 и во услови кога има покачување на бројот на новозаразени.
Здравствените установи не се оптоварени, капацитетите се празни, а голем дел од новозаразените се или без симптоми или се со благи симптоми и се на домашно лекување, појава што ја има и во други земји.
Но сепак, останува заедничката одговорност да се заштитиме од коронавирусот. Изборот е јасен – или ќе ги почитуваме мерките за заштита или ќе мора повторно да се враќаме на рестриктивни мерки, како што е карантинот или полицискиот час“, вели Снежана Калеска -Ванчева, координаторка на Форум на жени на СДСМ.
„Затоа е неопходно сите заедно, безусловно да ги почитуваме мерките за заштита. Да носиме маска секогаш кога е тоа потребно, да држиме физичка дистанца и да не се групираме.
Само на тој начин ќе се заштитиме од вирусот, бројот на новозаразени ќе опаѓа, исто како што опаѓаше кога сите се однесуваа одговорно и доследно ги почитуваа мерките.
Сите овие поголеми бројки, на кои сведочиме деновиве, се директна последица на неколку фактори.
Прво од неработењето и саботирањето на мерките од страна на Наќе Чулев. Наместо да преземе одговорност да се спроведуваат мерките и задолженијата, Чулев јавно порача дека нема да казнува и со тоа поттикна масовно кршење на мерките.
Целата јавност ги гледаше масовните прекршувања на забраните за собири и движења и бројните прекршувања на полицискиот час, само Чулев ги игнорираше и свесно не преземаше ништо.
Со тоа тој свесно го загрози јавното здравје и придонесе да имаме вакви бројки.
Второ, како што објави Министерството за здравство, тековните тестирања се таргетирани во познати кластери и затоа бројките се поголеми. Тоа значи дека се тестира во точно утврдени фамилии и населби и дека здравствениот систем добро знае што прави.
Она што е добро е што кластерите се семејни и дека тие кластери се под контрола.
Сите ние треба да знаеме дека нови случаи ќе има и понатаму, и сега, и среде лето, и на есен, но важно е тие да бидат што помалку, за да не се оптовари здравствениот систем.
Како одговорни граѓани треба да дадеме сериозен придонес во личната и колективна заштита од вирусот. Само така ќе го заштитиме нашето здравје и здравјето на нашите блиски и побрзо ќе ја надминеме оваа состојба“, изјави Снежана Калеска -Ванчева, координаторка на Форум на жени на СДСМ.