Ќе ги враќаме парите кај граѓаните и ќе отвориме можности за сите, ќе вложуваме во локалниот економски развој, нудиме директна поддршка за домашните фирми, пред се за малите и средните претпријатија, рече денеска кандидатот за градоначалник за Струмица од СДСМ, Коста Јаневски.
– Обезбедуваме еднакви услови за домашните и за странските инвеститори. Приоритетите на општината ќе ги правиме заедно со бизнис заедницата. Преку бизнис форуми ќе го проектираме и следиме локалниот економски развој. Младите, се нашиот приоритет. Да ги задржиме тука и да им обезбедиме достоинствен живот. Ќе посредуваме при вработување на едуцирани млади во бизнис секторот со ангажман од шест месеци, рече Јаневски.
Предвидени се, додаде, и стимулативни мерки за компаниите за вработување млади од 18 – 29 години.
– Ќе ги поддржиме старт-ап бизнисите за млади, чија главна цел е да се поттикне претприемништвото и да се овозможат одржливи вработувања. Со вложувањето во локалниот економски развој, обезбедуваме повеќе пари за општината и пак ги враќаме кај вас, додаде Јаневски.