Поради забрзаниот и актуелен развој на градот во делот кај касарната, во наредните четири години најголем акцент ќе ставиме на изградба на нова патна инфраструктура, најави денеска кандидатот за градоначлник на Струмица од СДСМ, Коста Јаневски.
– Планираме изградба на ново булеварско решение, кое ќе го поврзува градското јадро покрај Светиилијскиот канал, кој граничи со новиот урбан простор на касарната и Софилар и преку кој ќе се одвива комплетната сообраќајна поврзаност во границите на тој простор, продожувајќи кон населеното место Добрејци, рече Јаневски.
Во неговата програма најави и нов транзитен пат околу Струмица.
– Најголем акцент ќе ставиме на решавање на пристапните влезови во градот и тоа изградба на нова обиколница од клучката кај населеното место Куклиш покрај реката Тркања низ индустриската зона „ЈУГ“ во правец на населеното место Добрејци повзувајќи се со магистралниот пат А4 во должина од 5.800 метри. Со тоа ќе се ослободи сообраќајот по булеварот „Климент Охридски“ и ќе се пренасочи движењето на тешките товарни возила. Исто така, „Климент Охридски“ ќе добие нов изглед со булеварско решение со четири сообраќајни ленти на потегот од „Жито Струмица“до клучката кај Куклиш, рече Јаневски.
Јаневски го најави и проектот за изградба на доводен цевковод за сирова вода од акумулацијата Водоча до Филтер станицата во Струмица во вкупна должина од 8 километри како и проектот за изградба на подземниот премин од улицата „24 октомври“ до улицата „Ѓуро Салај“.