„Мислев дека сте дошле за дебата со аргументи, а вие сакате да ја одложите, ова е несериозно“, вака му се обрати премиерот на ректорот на УКИМ Велимир Стојковски кога тој ги изнесе забелешките на новиот закон за високо образование во име на ректорската управа на УКИМ, денеска на експресно свиканата дебата во Собранието иако законот е пред усвојување.
Ректорот Стојковски рече дека УКИМ не е против промени во насока на подобрување на квалитетот на високото образование, но дека е потребно повеќе време за дебата и промени во законот.
„Простор за импровизации не треба да има, но за тоа, ни треба да имаме една дебата која ќе биде поосежна и потемелна. Верувајте, се’ што ќе се направи во системот на високо образование ќе се врати по неколку години како бумеранг. Нашиот став како универзитетски Сенат и Ректорска управа дека ги поддржуваме сите промени во насока на подобрување на квалитетот на високот образование, но бараме поголем и подолг простор за дебата Ние имаме 130 страници со забелешки и навистина заслужуваат поголемо внимание отколку што сега го добиваат“, рече ректорот Стојковски.
Според премиерот Груевски веќе имало дебата и тоа од октомври – министрите настапувале на телевиизи зборувајќи за законот, а и во владата слушале се’ што се зборувало, сето тоа било дебата.
„Дебата имаме постојано, јавното излегување по медиуми на студенти, професори, министри, заменици министри, ректори и тоа е дебата. Се’ ние слушаме“, рече Груевски кој заборави да каже дека сиот овој период никој од владата не сакаше да разговара со студентите што протестираа, ниту со над 500 професори кои не се согласуваат со ваквиот начин на реформирање на образованието.
Вратите за наводна дебата беа отворени денеска пред ТВ камерите откако законот е веќе на второ читање во Собрание.