Никола Настески, сопственикот на „Никофон“ и на парцелата за изградба на барокна катна гаража кај „Аутомакедонија“ во центарот на Скопје денес избега од камерите. Тој рече дека не се снаоѓа добро пред камера па затоа не сака да го снимаат додека зборува за проблемот околу изградбата на катната гаража која жителите, но и Општината, велат дека нема да дозволат да се изгради.
Рече дека преку имејл ќе одговори на сите прашања и избега на другиот крај паркингот. Не си замина туку остана од далеку да ја следи средбата на градоначалникот со станарите кои се решени да не дозволат да се изгради објектот.
Иако најави одговори, до објавување на текстот, Настески не одговори на прашањата од „А1он“.
Заедно со него средбата на градоначалникот со станарите ја следеа уште неколкумина кои со себе имаа геодетска опрема, но не се доближија до парцелата.
Станарите околу парцелата и денес, исто како и неколкупати во изминативе години се понудија на Настески да му исплатат 127.000 евра, колку што тврдат дека ја платил парцелата, за да им ја отстапи.