Претседателот на СДСМ, Венко Филипче, од Брисел упати силна порака дека демократијата во Македонија е под сериозна закана и побара поддршка од европските институции и прогресивните политички сили.
„Борбата за слободата и демократијата во Македонија бара заедничка акција и солидарност. Донесената срамна резолуција на ДПМНЕ и ЗНАМ во Собранието претставува директен удар врз демократијата, слободата на говор и политичкото дејствување“, истакна Филипче.
Тој оцени дека носењето неуставна резолуција насочена против опозицијата е јасен сигнал за опасно лизгање кон авторитаризам.
„Кога парламентот носи акти со кои се замолчува опозицијата, државата престанува да биде демократска и влегува во режим“, нагласи Филипче.
Според него, актуелната власт има за цел да ја забрани и парализира работата на опозицијата, да воспостави еднопартиска држава и да ја задуши слободата на говор.
„СДСМ тоа нема да го дозволи. Ќе ја одбраниме демократијата, слободата и европската иднина на државата“, порача тој.
Филипче најави дека во Брисел ќе побара поддршка од европските институции, од сите прогресивни и демократски сили, како и од сестринските социјалдемократски и социјалистички партии.
„Македонија мора да остане слободна, демократска и европска држава. Време е за формирање единствен граѓански фронт – фронт за правда, слобода и демократија“, истакна Филипче, повикувајќи на обединување на сите граѓани без разлика на партиска, етничка или идеолошка припадност.