Поранешната специјална јавна обвинителка, Фатиме Фетаи пред почетокот на денешното рочиште за предметот „Насилство во Општина Центар“, рече дека исказот на ексразузнавачот Зоран Верушевски дека „бомбите“ биле модифицирани и компромитирани нема да влијае врз постапките на СЈО.
„По мене не. Тоа не може да влијае на автентичноста на материјалите со кои располагаме, ниту на постапките. Станува збор за исказ кој не е довршен“, рече Фетаи и појасни дека Верушевски ќе биде уште испрашуван и од странките во постапката и од судот.
– Толкување и појаснување може да даде само Верушевски, рече обвинителката Фетаи.
На последното рочиште за предметот за масовното прислушување „Таргет-Тврдина“, Верушевски, кој е советник за национална безбедност на премиерот Зоран Заев, даде исказ кој е спротивен на тврдењата на неговите ексколеги Ѓорѓи Лазаревски и Звонко Костовски.
Верушевски во судот кажа дека „бомбите“ од УБК директно се слевале во СДСМ, а не преку него и дека по неговото апсење прислушуваните материјали биле стравитно компромитирани и модифицирани.