Жална глетка во Центарот на Скопје. Насекаде трупци од исечени дрва, звук на моторните пили кои немилосрдно го оголуваат просторот. Се сечат сите дрва и се чисти простор за изградба на новата зграда-седиште на ВМРО-ДПМНЕ.
Некои само немо набљудуваат, а некои коментираат револтирано.
Велат, сигурно си набавиле и дозвола и соодветна документација. Но прашуваат до кога за згради и гаражи ќе се уништува зеленилото во строгиот Центар на Скопје.
„Ова е еколошки вандализам што го прави ВМРО-ДПМНЕ“, велат граѓаните.
Како што веќе објави А1он, прашуваат каде е Лилјана Поповска од ДОМ, кога дозволува нејзиниот коалициски партнер да го прави ова. Од претходно е познато дека ВМРО-ДПМНЕ ќе се подновува со нови партиски простории.
