„Советничката група на СДСМ и коалицијата, денеска во Советот на општина Центар ќе предложи заклучок за разрешување на незаконски поставената директорка на основното училиште „11 Октомври“.
До Градоначалникот беше доставен предлог за избор на директор од двајца кандидати за коишто членовите на училишниот одбор гласале два пати а дозволено е само еднаш“, изјави на денешната прес-конференција во име на советничката група на СДСМ и коалицијата во општина Центар, советничката Билјана Чурилова.
„Градоначалникот Андреј Жерновски го одби предлогот, но министерот за образование Абдулаќим Адеми изврши незаконскиот избор на директор на основното училиште во Центар.
Општина Центар поднесе кривична пријава против против инволвираните во случајот заради постоење на основано сомнение за сторени кривични дела: спречување за учество во управувањето, злоупотреба на службената положба и овластување и употреба на исправа со невистинита содржина.
Не е прв пат власта на Никола Груевски да направи директен упад во правата и надлежностите општина Центар“, рече Билјана Чурилова.