СДСМ бара ВМРО-ДПМНЕ да каже кој ќе понесе одговорност за доцнењето во изградбата на автопатот Кичево-Охрид и, како што рече, партискиот потпретседател Благој Бочварски, можните пенали кои дополнително ќе ги плаќаат граѓаните поради тоа што за доцнењето директно е одговорна државата која дозволила да се работи по речиси неупотреблив основен проект.
– Сто и дваесет милиони евра е цената која граѓаните ќе ја платат заради тоа што проектот за автопатот бил нецелосен, со речиси никакви геотехнички и геомеханички истражувања, без увид во состојбата на терен, со погрешно проектирани косини кои се нестабилни и се обрушуваат. Поради ова цената на тунелот на автопатот се покачила тројно, од 29 на 89 милиони евра, изјави денеска потпретседателот на СДСМ Благој Бочварски.
Огромни проблеми, додаде, има од 12-от до 18-от километар, од Кичево до Пресека каде се појавиле свлечишта, обрушувања на косините, затрупување на трасата, нерешени имотно правни односи, а потребна е и дислокација на енергетски објекти.
Челниците на ВМРО-ДПМНЕ, рече Бочварски, посегнале и по провизии, за уште повеќе да ги оштетат граѓаните.
– За овие автопатишта, СЈО има покренато случај, со сомнение дека разликата во цените од изведувачот до подизведувачите изнесува најмалку 155 милиони евра, рече Бочварски, упатувајќи прашање до ВМРО-ДПМНЕ дали „мислат дека барем еден граѓанин им верува кога за катастрофалните грешки на автопатите го обвинуваат СДСМ“.