Дали штетата од неколку стотини евра, колку што чини штетата на канцеларијата можеме да ја израмниме со штетата од неколкуте милијарди евра кои ги украде најтесното раководство на ВМРО-ДПМНЕ, прашува претседателот на Достоинство, Стојанче Ангелов.
– Иронично и крајно неморално е кога партијата чие највисоко раководство е аболицирано за тешки кривични дела ги нарекува луѓето кои што протестираа против овие криминалци хулигани. Луѓето кои што синоќа протестираа меѓу кои бев и јас беа се, но не беа хулигани. Груевски, хулиганите барајте ги меѓу вас и вашето најтесно раководство, рече Ангелов.
Тој вели дека немало потреба од насилство бидејќи полицијата ја започна интервенцијата на крајот на протестот, кога палењето и кршењето веќе беше заврешно.
– Немаше потреба полицајците да ги прогонуваат луѓето кои што беа на протест низ центарот на градот, полицијата приведе луѓе кои воопшто не беа насилни и не учествуваа на демолирањето. Ги повикувам полицајците нивниот гнев да го насочат на вистинското место, а тоа е раководството на ВМРО-ДПМНЕ, таму се вистинските криминалци кои ја опљачкаа нашата држава. Луѓето кои што протестираат се обични мирни луѓе кои дошле да го искажат својот гнев од срамот кој што го приреди оваа влада и на крај нелигитимниот претседател Ѓорге Иванов, вели Ангелов.
Претседателот на Достоинство истакна дека на протестот немаше повредени полицајци, но за жал, беа повредени повеќе демонстранти.