Граѓанската асоцијација „МОСТ“ ги започна активностите за набљудување на изборниот процес. За набљудување на локалните избори 2013 и денот на гласањето ќе бидат ангажирани повеќе од 3500 набљудувачи, на целата територија на Република Македонија.
МОСТ ги повикува граѓаните, лично, најдоцна до 2 март, да се пријават во 18-те регионални канцеларии, низ целата држава.
„Набљудувач во мисијата на Граѓанската асоцијација „МОСТ“ може да биде секој граѓанин со право на глас, кој е подготвен непартиски, непристрасно и објективно да го набљудува процесот и да известува за наодите. При селектирањето на набљудувачите предност ќе имаат оние кои во рамките на „МОСТ“ веќе имаат набљудувано избори“, рече Дарко Алексов, извршен директор на „МОСТ“.
Во насока на подигнување на свеста на граѓаните за нивните права и граѓански должности за проверка на своите податоци во Избирачкиот список, Граѓанската асоцијација МОСТ упатува јавен повик до сите граѓани да ги проверат своите податоци на интернет страната на http://izbirackispisok.gov.mk.
За промоциите, ветувањата и проектите, нема прецизна регулатива, а и кандидатите се уште немаат добиено верификација од ДИК.
Алексов вели дека и најдобриот Законик ако не се спроведува, е најлош. Препораките на ОБСЕ, особено најважните, не се имплементирани во изборната регулатива, но, правилата мора да се почитуваат од сите.
„МОСТ“ ќе ги провери написите околу финансирањето на ДУИ од Државни институции, па ќе излезе со став.