Во организација на Дирекцијата за заштита и спасување денеска во просториите на клиничката болница „Аџибадем Систина“ ќе се одржи вежба на која ќе биде тестиран Системот за заштита и спасување на болницата.
Дирекцијата за заштита и спасување за оваа вежба обезбеди четири шатори од кои два се наменети за повредени лица, еден за починати лица и еден шатор во кој ќе биде сместен штабот за заштита и спасување на клиничката болница. Обезбедени се и 25 заштитни маски како и две санитетски возила.
Вежбата се одржува со цел да се види подготвеноста на персоналот на клиничката болница во случај на вонредни состојби и како ќе се справат со настанатата ситуација.
Предвидено е да се изведат неколку вежбовни активности и тоа евакуација на лица затекнати во објектот, гасење на избувнат пожар, пружање на медицинска помош на повредени лица како и транспорт на повредени лица до соодветни медицински установи.
За организација на вежбата, Дирекцијата за заштита и спасување поддршка добила и од Црвениот Крст како и Противпожарната бригада.