Верниците од Куманово денеска се простија од митрополитот полошко кумановски г. Кирил, кој почина вчера на 79-годишна возраст.
Посмртните останки на митрополитот беа изложени во соборниот храм „Свети Никола“. Епископот лешочки Јосиф заедно со свештениците од Кумановската епархија отслужија заупокоена литургија за митрополитот Кирил.
– Ти беше и ќе останеш гордост на Македонската православна црква, на Полошко кумановската епархија и на секој Македонец како во татковината така и насекаде во дијаспората, истакна епископот Јосиф.
Во Соборниот храм „Свети Никола“ е отворена книга на жалост. Верниците велат дека долго ќе се сеќаваат на митрополитот кој со нив ги делел моментите на радост и тага.
Митрополитот Кирил 26 години ја водеше Полошко-кумановската епархија во која се опфатени архиерејските намесништва во Тетово, Гостивар, Куманово, Кратово и Крива Паланка.
ФОТО: kumanovonews.com