Општина Битола вечер на плоштадот „Гоце Делчев“ ќе го организира традиционалниот коледарски оган кој во 19 часот ќе биде запален на спектакуларен начин, информираат од таа локална самоуправа.
Манифестацијата ќе биде придружена со богата музичка програма во која ќе настапат групата „Бон Тон“, Петар Најдовски и групата „Боеми“, како и рок бендот „ТНТ“, „Фалш бенд“ и триото Дј Микар, Зоки Конга и Дадо труба.
– Продолжуваме да ја негуваме вековната традиција, а на барање на граѓаните обезбедивме и богата уметничка програма на централниот плоштад во Битола, истакна градоначалникот Владимир Талески.
Коледарски оган ќе биде запален и во Старата чаршија пред националната галерија на детското ликовно студио „Св.Кирил и Методиј“. Раководителот на студиото и на светски познатата манифестација „Мал битолски Монмартр“ Коста Хаџиантоновски изјави дека огнот ќе го запалат неколку познати занаетчии, а на присутните деца ќе им бидат доделени коледарски подароци.