Комисијата за верификација на факти на денешната седница прогласи две лица за соработници со тајните служби, а две лица за наредбодатели и корисници на информации. Еден предмет е целосно отфрлен, а за останатите се оставени за дополнителни сознанија. Како што соопшти портпаролот на Комисијата, Предраг Димитровски, на дневен ред биле единаесет предмети.
Еден од соработниците е поранешен носител на јавна функција, професор на Педагошкиот факултет во Битола и долгогодишен секретар на Друштвото за наука. Тој во 80-тите години бил евидентиран за соработник на поранешните тајни служби под псевдоним „Мисирков“, и ги кршел основните човекови права и слободи од идеолошки и политички причини. Ги известувал тајните служби за настапи на личности од областа на издавачката дејност, литературата и културата од позиции на македонски и албански национазлизам и сепаратизам.
Другиот соработник е поранешен пратеник и директор на Стоматолошките клиники во Скопје. Тој во 80-тите години бил евидентиран како оперативна врска, а ги прекршувал основните човекови права од идеолошки и политички причини на свои блиски соработници од клиниките.
Едниот од двајцата наредбодатели, бил потсекретар во Министерството за внатрешни работи, а потоа и заменик-јавен обвинител додека другиот бил републички секретар за внатрешни работи и окружен јавен обвинител, а во периодот на плурализмот и член на антикорупциската комисија.
Тие како наредбодатели ги прекршувале човековите права и слободи од идеолошко- политички и партиски причини, издавајќи наредби за следење на движењата и комуникациите на лица осомничени за настапување од позиции на македонски и албански национализам и сепаратизам.
Нивните сомневања не биле потврдени во законски утврдена процедура, а инидикативно е што ги прекршувале човековите права и слободи на малолетници средношколци, со што се прекршувани меѓународни декларации. Како што појаснуваат од лустрациска, се работи најчесто за вербален деликт, а некои од учениците, на пример, станувале предмет на оперативна обработка поради бојкот на часови по македонски јазик започнат заради намалување на часови по албански јазик.