Непознати лица украле делови и оштетиле уреди во мерна шахта од водоводната мрежа, која снабдува со вода за пиење четири гостиварски села.
Според СВР Тетово, непознати сторители извршиле провала и тешка кражба во мерна шахта, сопственост на Јавното претпријатие „Комуналец“, лоцирана во селото Мердита. Откако насилно ја отвориле шахтата, одзеле мерач-протоколер, а потоа на вентилот ја запреле водата во цевката од која се снабдува дел од Гостивар и селата Здуње, Дебреше, Долна и Горна Бањица.
Според директорот на ЈП Комуналец, Мемедали Џафери, освен материјалната штета која надминува 400 илјади денари, загрижува фактот што неодговорни лица, недозволено манипулираат со водоснабдителни објекти.
– Ова не е прв пат и тоа загрижува. Со последниов случај, жителите на четири села имаа проблем со водоснабдувањето се до санирање на дефектот. Очекуваме да бидат откриени сторителите, рече Џафери.
По пријавата во полиција, се работи на расветлување на сите поединости во врска со пријавената кражба.