Угостителите да работат до 21 часот, ќе се одлучува за нова рестриктивна мерка за Ковид-19

Од:

Дополнително ограничување на работното време на угостителските објекти, наместо до 23 часот тие да работат до 21 часот, е новата мерка за којашто, на предлог на Комисијата за заразни болести и Министерството за здравство, треба да одлучува денеска Владата.

Целта е да се спречи натамошно ширење на Ковид-19 од којшто во претходното деноноќие беа регистрирани уште 565 заразени од направени 1.325 тестирања, починаа 21 лице, од кои најмладиот на 45 години, а оздравеле 154 пациенти. Во клиниките и болниците низ државава вкупно се хоспитализрани 713 пациенти.

И во новата ковид статистистика за претходното деноноќие главниот град е со најмногу новозаразени 230 и сега има активни 5.042 случаи, при што најбројни во Аеродром 869, по што следат Карпош со 741, Центар со 668, Гази Баба со 650, Кисела Вода со 649, Ѓорче Петров со 402, Чаир 275, Бутел – 266,…Зад Скопје се Тетово со активни 636, Струмица 568, Прилеп 565, Куманово 466, Велес 438, Штип 308, Битола 299, Гостивар 259, Охрид 258, Кавадарци 240. Со троцифрен број се и Македонски Брод и Крива Паланка, каде има 106, односно 101 активен случај.

Од вчера во државава се врши тестирање со брзи тестови што Министерството за здравство ги доби како донација. Од најавените 13.000 брзи тестови пристигнаа 4.000, а останатите треба да бидат испорачани дополнително. Тестовите се најнова технологија со која за 15 минути се утврдува дали кај тестираниот е присутен вирусот Ковид 19. Брзите тестови се бесплатни за граѓаните, а ќе бидат распоредени низ 13- те болници во државата, во Клиниката за инфективни болести во Скопје, Болницата 8 Септември, Институт за белодробни заболувања кај децата – Козле и ЈЗУ Институт за белодробни заболувања и туберкулоза-Скопје, и ќе се користат како би се утврдило дали суспектните пациенти се позитивни на Ковид-19.

Како што најави министерот за здравство, Венко Филипче ќе биде купена и дополнителна количина тестови.

– Со ребалансот на Буџетот добивме близу 40 милиони денари и ќе бидат наменети за брзи тестови. Едноставно да стаса количина на тестови насекаде низ државата, во сите места каде што се прави тестирање согласно проценката и индикацијата да се направи еден или друг тип на тест, истакна Филипче во телевизиско гостување, потенцирајќи дека секојдневно го надградуваат системот, а ниту еден пациент не останал без тест во јавно-здравствена установа.

Ако евентуално актуелните мерките не даваат резултати, според Филипче, се размислува за целосно затворање на угостителските објекти неколку часови порано од тоа што е сега или целосно затворање на објектите каде што се одржуваат културни настани. Постојните мерки против Ковид-19, како што оцени, се добро димензионирани и нема потреба од карантин.

Вкупната бројка на ковид дијагностицирани во нашата земја од почетокот на епидемијата изнесува 32 997, бројката на оздравени пациенти е 21 244, на починати 1 025, а бројот на активни случаи 10 728. Досега во земјата се направени вкупно 253 173 тестирања на Ковид -19.

Од минатата недела, маските се задолжителни и на отворено со одредени исклучоци. Прекршување на оваа мерка се регистрира секојдневно, а според вчерашната статистика на МВР за неносење маска ниле санкционирани 737. Инспекторите, пак, кои со последните мерки добија дополнителни овластувања, вчера затвориле угостителски објект во гостиварското село Добридол бидејќи во него била организирана свадба со околу 120 гости.

Би можело да ве интересира

35-годишен пациент од Скопје почина од Ковид-19

Ана Ололовска

На инфективните одделенија во земјава се лекуваат 584 пациенти, слободни кревети има

Ана Ололовска

347 нови случаи на Ковид-19, починати се 11 лицa

Ана Ололовска

407 санкции за неносење маска

Ана Ололовска

Во ковид центрите во Скопје за 24 часа се хоспитализирани 20 пациенти

Ана Ололовска

Вакцинацијата не треба да биде трка меѓу земјите, ЕУ ќе обезбеди вакцини за Западен Балкан најбрзо што може, вели евроамбасадорот Гир

Ана Ололовска