Десетина пцовисани кучиња втор ден лежат кај претоварната станица на Јавното комунално претпријатие Тетово, лоцирана на влезот од градот. Лекарите првично проценуваат дека животните се отруени.
– Како што ги видов сликите, кучињата немаат физички повреди, околу устата имаат лигава материја, доказ кој првично укажува дека станува збор за масовно труење животни – изјави доктор Ратко Давидовски, вработен во Центарот за јавно здравје Тетово.
За да не настанат последици по здравјето на човекот, Давидовски апелира угинатите кучиња да се остранат и закопаат на соодветен простор.
Јавното комунално претпријатие Тетово е надлежно да изврши закоп на пцовисаните незгрижени животни. Но, оттаму сè уште немаат никаква информација за што станува збор, иако кучињата се на локација која претпријатието ја користи за претовар на ѓубрето.
Од Агенцијата за храна и ветеринарство преку електронска пошта известија дека ќе направат увид на местото за да ја утврдат фактичката состојба и евентуалната одговорност за ваквиот случај. Казните за несоодветно закопување на угинати животни, во согласност со Законот за нус-производи, изнесуваат од 3.000 до 5.000 евра за правното лице. Предвидената казна за физички лица, во согласност со овој закон, се движи од 500 до 1.000 евра.
Извор: Мета