Идеите на учениците од струмичката гимназија „Јане Сандански“ за „Перспективите на Коридорот 8“ се најуспешни на конкурсот што го распиша бугарската фондација „Бугарска памет“ на д-р Милан Врабевски.
Тие учествуваа со свои проекти како да функционра ова значајна комуникациска врска меѓу Македонија и Бугарија во иднина.
– На конкурсот се пријавивме по иницијатива на нашата професорка Јованка Михаиловиќ. Многу може да се зборува на ова тема. Пред се како можност за поврзување и заработувачка, развој на туризмот и друго. Нашата идеја беше да се воведе побрзо преминување на граничниот премин, односно документите да се предаваат на излезот од едната држава, а да се добиваат на влезот во другата, вели една од ученичките од победничката екипа, која учествуваше на конкурсот.
Третопласираната екипа, исто така од струмичката гимназија, имаше проект за електронско пополнување на шпедитерските документи, кои се уште рачно се пополнуваат.
– Секој превоз на стока треба да поминува со една обична апликација, која ние ја подготвивме, рече ученичка од третопласираната екипа.
На конкурсот на бугарската фондација учествуваа 35 ученици од Струмица, поделени во повеќе екипи.