Во сите градови од Македонија ќе се воведуваат дежурни аптеки кои ќе работат и во ноќните часови, најави денеска министерот за здравство Никола Тодоров, одговорајќи на пратеничко прашање.
Според него, ова е сериозен проблем на кој Министерството веќе подолго време заедно работи со Фондот за здравствено осигурување.
– Се прашувам зошто ова прашање не го поставивте кога бевте на власт? Дали поставувате прашања кои се од интерес на граѓаните само кога сте во опозиција? Секогаш кога ја имате одговорноста да управувате со институциите, овие и вакви прашања не доаѓаат на дневен ред, се водите од други интереси, некогаш лични, некогаш партиски, му рече Тодоров на Менде Динески од СДСМ кој праша дали се планира отворање дежурна аптека во Битола.