„Разговорите со Синдикатот на Клинички центар се во тек. Повторно има допис, кој го гледам како нов ултиматум. Гледам дека ја укинале и одлуката која беше донесена за започнување на штрајк. На овој начин дефакто се признава дека правните аспекти на претходниот штрајк не биле запазени и оти имало правни недостатоци во целата одлука, а со тоа се потврдува нашата загриженост дека организирање незаконски штрајк може да има сериозни последици и по луѓето што се во штрајкувачкиот одбор и по Синдикатот, но и по целиот здравствен систем“, рече министерот за здравство, Никола Тодоров.
Ресорниот министер нагласи дека не сака да дискутира со Синдикатот преку медиумите, бидејќи така се намалува довербата и се одалечуваат двете страни.
„Нашата идеја не е да стопираме штрајк, туку да не дозволиме нелегитимен штрајк кој може да има тешки последици и за тие што се во делот на организацијата и за луѓето кои се вклучени“, истакна министерот.