Холандија безрезервно ја поддржува интеграцијата на Македонија во НАТО и во ЕУ, порачал холандскиот минситетр за надворешни работи Франс Тимерманс на средбата со претседателот на ДУИ Али Ахмети.
Тимерманс, како што соопшти ДУИ, изразил очекување за што поскоро постигнување компромис меѓу Македонија и Грција за спорот за името. Ја нагласил и потребата од продолжување на интегративните политики, политиките за помирување, а не на националистичките политики.
Тимерманс најавил дека ќе ги контактира неговите колеги во ЕУ и оти ќе говори за потребата да се реши спорот за името и блокадата на Македонија на најдобар можен начин како дел од европската агенда за проширување. Но, истовремено ја нагласил потребата страните да изразат политичка волја за постигнување компромис, како и да се интензивираат напорите за решение.
Тимерманс исто така искажал и загриженост за слободата на изразување и на медиумите во Македонија, соопшти ДУИ
Али Ахмети, пак, го истакнал придонесот на Холандија за вопоставување на мирот и изградбата на демократски институции во Македонија и регионот.
Посочувајќи на придонесот што го дала Холандија за склучување на Охридскиот договор, како и во периодот по постигнувањето на мирот, Ахмети изразил загриженост што сите овие големи достигнувања постигнати со партнерство со меѓународната заедница се загрозуваат со доцнењото на зачленување на Македонија во НАТО и ЕУ.
– Доцнењата може да влијаат, исто така, и во квалитетот и динамиката на реформите очекувани од ЕУ. Затоа, како што заеднички ги градевме мирот и стабилноста во Македонија и регионот, заеднички, со помошта на Брисел, Вашингтон и земјите членки на ЕУ, ќе треба да ја решиме сериозната пречка која што ја држи во заложништво евроатлантската иднина на Македонија. Тоа може да се постигне само преку поактивното вклучување на ЕУ и пријателските земји како Холандија, истакна Ахмети.