Секторот за внатрешни работи Тетово утре ќе стартува со финалните активности на превентивно-едукативниот проект „Стоп на говорот на омраза“, чиј носител е Отсекот за превенција. Преку посебни предавања досега вкупно биле опфатени над 3.000 средношколци од прва година од Полошкиот регион.
Во рамки на овие активности, на педесетина ученици и нивните ментори ќе им бидат дистрибуирани сликарски материјали, со кои тие дома ќе изработуваат уметнички творби на тема „Не навредувај, различности почитувај“. Целта на проектот е и да се упати порака да се почитуваат различните мислења, припадности и ориентација, со цел да се поттикнат вистинските вредности и критериуми меѓу младите и да се намалат насилни и други постапки, како последица на претходно искажан и споделен говор на омраза, вели портпаролот Марјан Јосифоски.
Делата, кои ќе бидат изработени со овие материјали кон крајот на месецот, ќе бидат изложени во Тетово и Гостивар, со порака да му се застане на патот на говорот на омраза кој, за жал, е присутен, најмногу на социјалните медиуми и во што најчесто се инволвирани ученици од средношколска возраст.