Полициски службеник од кумановско Лојане, заедно со неговите роднини се степал со соседите, пред полициската станица во Куманово.
Триесет и тригодишниот М.М, референт по возачка дозвола и неговиот татко, брат, чичко и братучед се пресметувале со ножеви со Љ.Р (20), С.Р (28) и М.Р (50).
Инцидентот започнал завчера напладне, кога браќата Љ.Р и С.Р дошле на работа кај референтот и поради нерасчистени сметки од минатото, почнале да го навредуваат и го повикале да се пресметаат надвор.
Полицаецот веднаш заканите ги пријавил во полициска станица, но во меѓувреме ги повикал и неговите роднини да дојдат пред станицата. Роднините го пресретнале М.Р, таткото на соседите и го нападнале со тупаници.
Дежурните полицајци притрчале да ги разделат, но еден од напаѓачите удрил еден полицаец и му нанел повреда на главата.
Неколку минути потоа на влезот на полициската станица повторно настанала тепачка, при што еден од браќата Љ.Р се обидел со нож да го прободе таткото на референтот, нанесувајќи му рана во пределот на градите.
Полицајците успеале да ги совладаат насилниците и подоцна ги притвориле.
Насилниците ќе одговараат за обид за убиство, напад врз службено лице при вршење безбедносни работи, насилство, загрозување со опасно орудие при тепачка или караница и загрозување на сигурноста.