Mинистерот за здравство Арбен Таравари денеска потврди дека се назначени нови директори на клиниките за неврохирургија и за радиотерапија и онкологија.
За нов медицински директор на Клиниката за радиотерапија и онкологија, Таравари го назначил д-р Никола Васев, кој доаѓа на местото на Милан Ристески. За в.д. директор на Неврохирургија, на предлог на лекарски конзилиум на клиниката, е поставен Илија Панговски, на местото на Александар Чапаровски.
Таравари појасни дека се воспоставува нов начин на избор на директори на јавните здравствени установи во консултација со лекарската фела.
– И со другите клиники вака ќе се постапува, истакна Таравари по неговата средба заедно со министерката за образование и наука Рената Дескоска со претставници на граѓанската иницијатива „5 до 12“.
Додаде дека ќе изнајдат решение, како што рече, компетентни и професионални луѓе кои се почитувани во својата фела и во својата клиника да бидат управувачи на тие клиники.
Одговарајќи на новинарско прашање во врска со тоа дека Клиничкиот центар десет години не плаќал вода и колкав е долгот, рече дека Општи служби и Водовод и канализација ќе најдат решение. Посочи дека долговите се од сите клиники и дека ревизија ќе има без исклучок.