Денешното рочиште за случајот „Траекторија“ беше одложено од причина што судењето не било подготвено за тонско и визуелно снимање. Одбраната побара се што се случува во судницата да биде снимено во видео или аудио формат.
Во случајот „Траекторија“, обвинети се поранешниот премиер Никола Груевски, вицепремиерот Владимир Пешевски, ексминистерот за транспорт и врски, Миле Јанакиески и поранешниот директор на Агенцијата за државни патишта, Љупчо Георгиевски, за злоупотреба на службената положба и овластувањата за лични цели.
„Одложено е поради тоа што не е снимено и не се снимаше. Во законот се вели дека мора видео или тонски да се снима. Сакаме сè што се случува и сè што се кажува да не внимаваме што е запишано во записникот, туку да биде сè снимено. Ако нема услови за снимање, нека го променат законот“, рече адвокатот Еленко Миланов.
Груевски, Пешевски, Јанакиески и Георгиевски се обвинети дека во 2012 и во 2013 година презеле повеќе дејства со кои во постапката за избор на компанија за изградба на автопатните делници Миладиновци – Штип и Кичево – Охрид ги искористиле и пречекориле своите овластувања.
Со тоа, според СЈО, му нанеле штета на државниот буџет од најмалку 155.117.172 евра и за истиот износ на компанијата изведувач ѝ овозможиле да стекне имотна корист.