Општина Струмица од денеска започна со поставување нови куќни броеви и табли со имиња на улици, мостови и други инфраструктурни објекти,за што ќе бидат потрошени сто илјади евра од општинскиот буџет.
Со поставување на бројот еден и таблата на улицата „Сандо Масев” на зградата на општинската администрација, денеска општина Струмица започна со замената на старите со нови куќни броеви, како и нови табли со имињата на улиците во градот и населените места.
На прес-конференцијата градоначалникот Зоран Заев истакна дека ова е прва акција на општина Струмица во новата година,а истата од оправдани причини не е реализирана во 2012 г.
– Станува збор за многу важен и нужен проект кој е во согласност со Законот за определување на имиња на улици,плоштади,мостови и други инфраструктурни објекти, како и со Одлуката на советот, со која се изврши промена и ставање на нови имињата на околу 90 улици во градот.За реализација на оваа акција ќе бидат потрошени 100.000 евра од општинскиот буџет. Главен изведувач е „Раде Кончар” од Скопје, а во реализацијата се вклучени и фирми од Струмица. Со цел побезболно и побрзо одвивање на оваа акција, како и запазување на постојниот нумеролошки систем, новолегализираните објекти покрај куќниот број, ќе добијат и буква,рече градоначалникот Заев.
Општина Струмица апелира граѓаните да помогнат во реализацијата на оваа законска обврска, со цел олеснување на работата на поштата и јавната администарција во доставувањето на документите и пратките на вистинската адреса.