Во Струмица денеска и утре во организација на Канцеларијата за европски проекти, се одржува семинар на тема „Развој на алтернативни форми на туризам во пограничните општини Струмица од Македонија и Лерин од Грција”, во рамки на ИПА Програмата за прекуграничен развој.
Како што изјави Ѓоко Ристовски, проект-менаџер од Канцеларијата за европски проекти, на семинарот ќе бидат разгледани проектните активности и изработка на свот-анализа меѓу двете погранични општини.
– Во овој проект се опфатени истражувачки, инфраструктурни и промотивни активности. Во делот на истражувачките активности, во фаза е изработка на Стратегија за развој на туризмот во Струмица. Во инфраструктурните активности, се врши утврдување на 30 патеки со кои ќе се збогати туристичката понуда, а паралелно течат и подготовките на документарен филм и спот со туристичките понуди на Струмица, нагласи проект-менаџерот Ѓоко Ристовски.
За претставникот на градот Лерин, Амбас Василис, овој проект претставува убава можност за размена на искуства и зближување на граѓаните од двете погранични општини.
– Ова е наша прва соработка со локалната власт од Струмица и се надевам дека средствата кои ги добивме преку ИПА-Програмата за прекуграничен развој ќе ги искористиме за претставување и развивање на алтернативниот туризам, како и за отворање нови соработки меѓу туристичките работници од двете општини,изјави Амбас Василис.
Во рамки на дводневниот семнар гостите ќе ги посетат туристичките знаменитости на Струмица.