Општина Струмица денеска по 23 пат беше домаќин на републичките детски средби „Цвеќе“. Околу 100 деца од целата држава во Домот на АРМ и на платото пред него, правеа икебани и цртаа на тема цвеќе.
-Во Република Македонија и во Струмица се одржуваат многу натпревари од сите наставни области во основното и средното образование, но овие натпревари имаат една специфичност што кај учениците го градат она што е естетска вредност, култура, она што е уметнички израз кај ученикот, што во животот е многу потребно покрај стекнувањето со дипломата. Исто така, преку изработката на икебаните и цртежите децата го градат култот кон цвеќето, што е голема работа. Ние во таа насока се трудиме што повеќе децата да ги вклучиме во овие натпревари со што не само што ќе го градат чувството кон цвеќето и убавината, туку и чувството кон здравата животна средина, затоа што цвеќето е дел од здравата животна околина, рече Соња Чурлинова раководител на одделението за образование при општина Струмица.
Организатор на овие средби е домот за деца и млади „Благој Јанков Мучето“, а се одржуваат под покровителство на Градоначалникот Зоран Заев и општина Струмица.